Александр Лукашенко Бишкекте Владимир Путин менен болгон жолугушууда Украина боюнча сүйлөшүүлөрдү Минскиде кайра баштоону сунуштап, Белоруссия мындай сүйлөшүүлөрдү кабыл алууга «дайым даяр» экенин билдирди. Жолугушуу «Ала-Арча» мамлекеттик резиденциясында өтүп жатат. Лукашенко ЖККУ саммитинин алдында иш сапары менен Бишкекке келген.

Путин 25-ноябрдан бери Кыргызстанда мамлекеттик сапар менен жүрөт. Эки лидер 27-ноябрда өтө турчу ЖККУнын Коллективдүк коопсуздук кеңешинин жыйынына катышат. Анда эл аралык жана аймактык коопсуздук маселелери талкууланып, уюмдун ишинин жыйынтыгы чыгарылат жана жыйынтык декларациясы кабыл алынат. Ошондой эле баңгизаттардын мыйзамсыз жүгүртүлүшүнө жана мыйзамсыз миграцияга каршы күрөш боюнча чечимдер кабыл алына турганы пландалган.