Бишкек шаарынын “Ынтымак” сейил багында болгон массалык мушташка байланыштуу 7 жаран кармалды. Бул тууралуу Бишкек шаардык милициясы билдирди.

Маалыматка ылайык, окуя 18-август күнү танкы саат 03:30 чамасында болгон. Анда белгисиз адамдар коомдук тартипти бузуп, массалык түрдө мушташкан. Аталган факт боюнча Кылмыш-жаза кодексинин 280-беренеси (бейбаштык) менен кылмыш иши козголгон.

Ыкчам тергөөнүн жыйынтыгында мушташты уюштурууга шектелип 20 жана 22 жаштагы жарандар кармалып, убактылуу кармоочу жайга камакка алынган.

Мындан тышкары, тергөөгө 5 жаран жеткирилип, Укук бузуулар жөнүндө кодексинин 126-беренесине (майда бейбаштык) ылайык протокол түзүлгөн. Учурда тергөө иштери уланып жатканы айтылды.