Бишкек шаарында велосипед жана скутер уурдоого шектелип 3 жаран кармалды. Бул тууралуу Биринчи май райондук милициясы кабарлады.
Маалыматка ылайык, 26-февралда милицияга шаар тургуну кайрылып, 20-февралда саат 19:15 чамасында белгисиз адамдар Панфилов көчөсүндөгү үйдүн кире беришинен жалпы баасы 75 миң сом болгон эки велосипедди уурдап кеткенин айткан.
Аталган факт боюнча Кылмыш-жаза кодексинин 205-беренесинин (уурдоо) негизинде кылмыш иши козголгон.
Иликтөө иштеринин натыйжасында шектүү катары 31, 29 жана 22 жаштагы үч жаранды кармалган. Алар убактылуу кармоочу жайга камакка алынган.
Милиция билдиргендей, тергөөнүн жүрүшүндө кармалгандардын дагы ушул сыяктуу 15тен ашык кылмышка тиешеси бар экендиги аныкталган.
