Бишкекте көп кабат үйдөгү жарылуудан кийин өрттөн каза тапкан адам Кореянын жараны болгон. Бул тууралуу Октябрь райондук милициясынан билдиришти.
Маалыматка караганда, 21-августта саат 15:40та «102» кызматына 3-кичи райондогу көп кабаттуу үйдө газ баллону жарылганы тууралуу маалымат түшкөн.
Окуя жерине Октябрь райондук милициясынын ыкчам-тергөө тобу барып, батирдин ичинен Кореянын 50 жаштагы Л.С. аттуу жаранынын сөөгү табылган. Сырттан кароо учурунда анын денесинде эч кандай ур-соккунун издери табылган эмес.
Кырсыктан жабыркагандардын бири №3 балдар ооруканасына, экинчиси №4 шаардык ооруканага алынып кеткен.
Аталган факт каттоого алынып, териштирүү иштери башталган.
Маркумдун өлүмүнүн себебин аныктоо үчүн соттук-медициналык экспертиза дайындалган. Ошондой эле алдыда өрт-техникалык экспертиза дайындалат.
Эскерте кетсек, буга чейин ӨКМ Бишкектин 3-кичи районунда көп кабат үйдө жарылуу болуп, өрттөн бир адам каза тапканын билдирген.
Биздин Телеграм каналга катталыңыз
