Эртең, 4-ноябрда Жогорку Кеңеш кезексиз жыйынга чогулуп, Борбордук шайлоо комиссиясынын мүчөлүгүнө Акылбек Сариевдин талапкерлигин карайт.
Жогорку Кеңештин басма сөз кызматынын маалыматына караганда, парламенттеги Конституциялык мыйзамдар, мамлекеттик түзүлүш, сот-укук маселелери жана регламент боюнча комитети Акылбек Сариевдин талапкерлигин жактырып, парламенттин жалпы кароосуна жиберген.
Акылбек Сариевдин талапкерлиги Борбордук шайлоо комиссиясынын төрайымынын мурдагы орун басары Атыр Абдрахматованын ордуна “Өнүгүү-Прогресс” фракциясы тарабынан сунушталган.
Абдрахматова 16-октябрда кызматтан кетүү боюнча арыз жазып, 28-октябрда Жогорку Кеңеш анын арызын канааттандырган.
Акылбек Сариев 2010-2011-жылдары БШКнын төрагасы кызматын аркалаган.
