Бүгүн, 9-декабрда, болжол менен саат 09:40тар чамасында «102» кызматына борбор калаадагы №10 жана №62 мектептерге жардыргыч зат коюлду деген маалымат түшкөн. Бул тууралуу Бишкек ШИИБи билдирди.

Аталган мектептерге дароо миилциянын ыкчам-тергөө топтору, Патрулдук милициянын жана Кайгуул кызматынын кызматкерлери жана кинологдор жөнөтүлгөн.

Учурда мектептердин администрациясы жана окуучулар эвакуацияланып, аймак курчоого алынды. Милиция кошумча маалымат берилерин билдирди.

Бишкек ШИИБи теракт же жардыргыч зат коюлду деген атайлап жалган билдирүүлөр үчүн кылмыш жоопкерчилиги каралганы, анын ичинде эркинен ажыратуу да бар экенин билдирди.