Бүгүн, 15-январда Жогорку Кеңештин жалпы жыйыны өтүп жатат. Анда “Үй-бүлөлүк зомбулуктан сактоо жана коргоо жөнүндө” Кыргыз Республикасынын Мыйзамына өзгөртүүлөрдү киргизүү тууралуу” мыйзам долбоору каралууда.
Талкуу учурунда депутат Рада Туманбаева кылмышка шектүүлөрдүн жүзүн, аты-жөнүн социалдык тармактарда жашырбай ачык көрсөтүүнү сунуштап, зомбулук жасаганга шектелгендерге чара колдонуу боюнча өзгөртүүлөр керек экендигин билдирди.
«Алардын бетин жаап-жашыруунун кереги жок. Коом алардын ким экенин билсин», — деди эл өкүлү.
Туманбаева аймактарда жашагандардын көпчүлүгү үй-бүлөлүк зомбулуктан сактоо жана коргоо жөнүндө мыйзамдын бар экендигин билишпейт экенин айтты.
