Мындан ары курулуп жаткан объекттердин реестрине капиталдык курулуш, реконструкциялоо, имараттарды кайра профилдештирүү жана кайра пландоо объекттерин киргизүү үчүн акы төлөө талап кылынат. Бул тууралуу Курулуш министрлиги билдирди.

Төлөмдүн өлчөмү жана тартиби Кыргызстандын ченемдик укуктук актыларына ылайык белгиленет. Ошондой эле, курулуш субъекттери объектини реестрге киргизүүдө Мамлекеттик архитектура-курулуш контролдоо департаментине арыз берүүдөн мурда тиешелүү төлөмдү жүргүзөт.

Мындай өзгөртүү республикалык жана жергиликтүү бюджеттин эсебинен каржылануучу объекттерге тиешелүү эмес.

Акы төлөнүүчү кызматтарды киргизүүнүн негизги максаттары:

• Объекттерди каттоонун бирдиктүү механизмин түзүү;
• Курулуш сапатын жана коопсуздукту жогорулатуу;
• Курулуп жаткан объекттердин реестрин бир калыпта түзүү;
• Курулуш процессинде туруктуу мамлекеттик көзөмөлдү камсыз кылуу;
• Коррупциялык тобокелдиктерди азайтуу.

Курулуш министри Нурдан Орунтаев 100дөн ашык курулуш компанияларынын жетекчилери менен жолугуп, аталган токтом боюнча жана андагы негизги өзгөртүүлөр тууралуу маалымат берди. Ал бу чечим курулуш тармагындагы тартипти чыңдоого, объектилерди каттоонун бирдиктүү механизмин түзүүгө жана курулуштун ар бир этабынын коопсуздугун камсыз кылууга багытталгандыгын белгиледи.