Кыргызстандын энергетика министри Таалайбек Ибраев президент Садыр Жапаровдун электр энергиясынын өчүрүүлөрүнө “дагы эки жарым жыл чыдоого туура келет” деген билдирүүсүнө түшүндүрмө берди.

«Чындык канчалык ачуу болбосун, аны айтууга тийишпиз», — деди Ибраев. Ал сынчылар дайыма эле ири гидроэлектр станцияларды куруу эмне үчүн көп убакыт талап кыларын түшүнбөйт деп билдирди.

Анын айтымында, процесс курулуш менен гана чектелбейт:

“Кээ бирөөлөр акча болсо эле дароо куруп баштаса болот деп ойлошот. Бирок андай эмес. Адегенде техникалык-экономикалык негиздеме даярдалып, экологиялык экспертиза өткөрүлүшү керек, банктар менен донорлордун макулдугу алынат. Бул документтерсиз эч ким каражат бербейт”, — деп түшүндүрдү министр.

Министр курулуш иши эң тез жүрүүчү этап болуп саналарын, ал болжол менен бир жылга созуларын кошумалады. Бирок долбоорлоо, макулдашуу жана жабдууларды даярдоо иштери бир нече жылды талап кылат, анткени ири генераторлор ар бир ГЭСке өзүнчө ылайыкташтырылып жасалат жана сериялык түрдө чыгарылбайт.

Министр белгилегендей, Камбар-Ата ГЭС-1 ишке берилгенден кийин Кыргызстан электр энергиясын импорттоону токтотуп, тескерисинче экспорттой баштайт, анын ичинде Кытайга да коңшу өлкөлөр аркылуу өтпөстөн түз жеткирүү мүмкүнчүлүгү пайда болот.

Азыркы учурда республика электр энергиясын Түркмөнстандан (Өзбекстан аркылуу) жана Орусиядан (Казакстан аркылуу) алып, транзит үчүн төлөм жүргүзүүдө.

«Камбар-Ата-1» долбоорунун жалпы наркы 4,5 миллиард доллар деп бааланууда. Ибраевдин айтымында, Кыргызстан буга чейин долбоор үчүн мамлекеттик бюджеттен 70 млн доллар бөлгөн, бул каражатка 113 метрлик туннель, жол, подстанция, электр берүү линиялары курулуп, Нарын дарыясына көпүрө тургузулууда.

256 метр бийиктеги плотина жылына болжол менен 6 млрд кВт·с электр энергиясын өндүрө алат. Министр баса белгилегендей, долбоор толугу менен Кыргызстандын көзөмөлүндө болот, бирок Казакстан жана Өзбекстан да ар бири 1,5 миллиард доллардан инвестиция салып, каржылоого катышат.