АКШнын президенти Дональд Трамп америкалыктарга кайрылуу жасап, ал АКШнын Ирандагы операциясынын айланасындагы кырдаалга арналды. Анын айтымында, Кошмо Штаттар өз максаттарына жетүүгө аз калды.

«Жана биз бул ишти аягына чыгарабыз. Жана муну абдан тез жасайбыз. Биз буга абдан жакынбыз. Биз план боюнча баратабыз жана жакынкы аралыкта Американын бардык аскердик милдеттерин аткарабыз. Жакынкы эки-үч жуманын ичинде АКШ Иранга күчтүү сокку уруп, өлкөнү таш дооруна кайтарат», — деди Ак үйдүн башчысы.

Трамп дагы эмнелер тууралуу айтты:

• Ормуз кысыгы аркылуу мунай алган өлкөлөр бул каттам аркылуу өтүү коопсуздугун камсыз кылууга өздөрү кам көрүшү керек;
• Иран мындан ары коркунуч жаратпайт: өлкө Жакынкы Чыгыштын «бейбашы» болгон, бирок азыр андай эмес;
• АКШ Жакынкы Чыгыштан толугу менен көз каранды эмес жана жакынкы чыгыш мунайына муктаж эмес, ал эми америкалык аскерлер аймакта союздаштарын колдоо үчүн жүрөт;
• Вашингтон аскердик операциянын жүрүшүндө Ирандагы бийликти алмаштырууну максат кылган эмес, бирок ал ишке ашты;
• Эгерде ислам республикасы өзөктүк (ядролук) объектилерин калыбына келтирүүгө аракет кылса, АКШ Иранга ракеталык сокку урат;
• АКШ азырынча ирандык мунай инфраструктурасына сокку ура элек, бирок мындай кадамга барышы мүмкүн;
• жаңжалдын эң оор бөлүгү артта калды, анын айтымында, кырдаалдын мындан аркы өнүгүүсү жеңилирээк болот.