IBC Global эл аралык консалтинг компаниясынын божомолуна ылайык, Кыргызстандагы сапаттуу (A жана A+ класстагы) кампалардын рыногу кескин өсөт.

Маалыматта айтылгандай, кампалардын аянты 2025-жылдын башында 108 миң м² болсо, 2027-2028-жылдары 1,3 миллион м²ден ашары күтүлүүдө. Ал эми 2030-жылга карата өлкөдө сапаттуу кампалардын рыногу 1,6 миллион м²ден ашат деп болжолдонууда.

“Кампа рыногунун 12-15 эсе өсүшү Кыргызстанды Борбор Азиядагы логистикалык өнүгүүнүн лидери кылат”,- деп айтылат маалыматта.

Аталган компания 2025-жылдын июнь айына карата сапаттуу кампа аянттарына болгон таңсыктык 250 миң м² деп бааланып жатканын кошумчалады.

“А класстагы бош жайлар дээрлик жок. Кампа мүмкүнчүлүктөрүнүн 90%ы Бишкек менен Чүй облусуна туура келет. Мындан тышкары, Бишкек – Ош коридору жана чек ара аймактары боюнча да өнүгүү байкалууда”,- деп билдирди IBC Global .