Кыргызстандык аял 7,5 кг алтын менен Индиянын Индира Ганди атындагы эл аралык аэропортунда кармалды. Бул тууралуу Ommcom News жазды.

Маалыматка караганда, аял Кыргызстандан Нью-Делидеги аэропортко кечээ, 27-октябрда учуп келген. Бажы кызматкерлери алтынды текшерүү учурунда тапкан.

“Ал төрт алтын куйманы корсетте жасалган чөнтөктөргө катып алып өтүүгө аракет кылган. Анын алтынга тиешелүү документтери болгон эмес”, – деп айтылат маалыматта.

Бул окуя боюнча “алтын аткезчилиги” боюнча кылмыш иши козголгон. Жергиликтүү соттун чечими менен ал 14 күнгө камакка алынган.

Биздин Телеграм каналыбызга катталыңыз