Жарандык активист Тилекмат Күрөновго издөө жарыяланды. Бул тууралуу ИИМдин Тергөө кызматынын башчысынын орун басары Нурдин Эшимкан уулу бүгүн, 10-январда Кемпир-Абад иши боюнча кармалган адамдардын жакындары менен жолугушуу учурунда билдирди.
Анын айтымында, Кылмыш-жаза кодексинин 277-беренеси боюнча айыпталгандардын, тактап айтканда массалык башаламандык уюштурууга шектелип кармалгандардын камоо мөөнөтү 20-февралга чейин узартылган.
“Учурда 24 адам камакта, экөө үй камагында. Бир жаранга издөө жарыяланган. Тергөө иштери боюнча лингвистикалык, политологиялык, техникалык экспертизалар дайындалган. Анын негизинде дагы чечимдер кабыл алынат”, — деди Нурдин Эшимкан уулу.
Белгилей кетсек, буга чейин жарандык активист Тилекмат Күрөнов саясий куугунтуктан улам Кыргызстандан чыгып кетүүгө аргасыз болгонун билдирген. Ал Кемпир-Абаддын Өзбекстанга өтүшүнө каршы чыгып, суу сактагычты коргоо комитетинин мүчөсү болгон.
Буга чейин Тилекмат Күрөнов «бийликти күч менен басып алууга чакырык жасоого» айыпталып, 1 жылга, ошондой эле «добуш сатып алууга» айыптуу деп табылып, дагы 6 айга, жалпы 1,5 жылга эркинен ажыратылган. Ал өзүнө ачылган кылмыш ишти куугунтук катары баалаган. Активист жаза мөөнөтү бүткөндүгүнө байланыштуу абактан чыккан.
Белгилей кетсек, бүгүн, 10-январда Кемпир-Абад иши боюнча камакка алынгандардын туугандарына ИИМдин имараты алдында митинг өткөрүүгө уруксат берилбей жатат. Милиция кызматкерлеринин айтымында, Биринчи май райондук соту райондун аймагында митинг өткөрүүгө тыюу салган.
Биздин Телеграм каналыбызга катталыңыз
