София шаарында өтүп жаткан хоккей боюнча дүйнө чемпионатында Кыргызстандын улуттук курама командасы Болгариянын курамасын 5:3 эсебинде жеңди.

Бул Кыргызстандын экинчи дивизиондогу (B тайпасы) алгачкы беттеши. Оюндун жүрүшүндө Ислам Абдыраев үч шайба киргизип, хет-трик жасады.

Шайба киргизген оюнчулар жана ассистенттер:

• 1:0 — Мамед Касабеков (00:32);
• 2:0 — Ислам Абдыраев (02:18), ассистенттер: Михаил Чувалов жана Александр Титов;
• 3:0 — Ислам Абдыраев (03:10), ассистент: Максим Егоров;
• 4:1 — Артем Кузьмич (18:41), ассистенттер: Георгий Фитисенко жана Евгений Мирнов;
• 5:2 — Ислам Абдыраев (20:25), ассистент: Антон Кудашев.

Улуттук курама команданын машыктыруучулар штабы бул жеңиш команданын эл аралык деңгээлдеги атаандаштыкка жөндөмдүүлүгүн далилдерин билдирди.

Болгариянын София шаарында өтүп жаткан чемпионат 12-апрелге чейин созулат. Бүгүн, 7-апрелде, Кыргызстандын командасы Кытай Тайбэйи менен беттешет. Оюн Бишкек убактысы менен саат 13:30да башталат.

Хоккей федерациясы жарандарды команданын оюндарын байкап турууга, трибуналарда жана социалдык тармактарда колдоо көрсөтүүгө чакырат.