Бүгүн, 1-июнда саламаттык сактоо министри Алымкадыр Бейшеналиев кыргыз-түрк достук ооруканасында болуп, боорду алмаштыруу боюнча операциялар боюнча окуудан өтүп, Түркиядан жакында эле кайтып келген башкы дарыгер жана трансплантологдордун тобу менен жолугушту.
Саламаттыкты сактоо министрлигинен билдиришкендей, министр дарыгерлерге алардын кесипкөйлүгүн жогорулатууга болгон каалоолору үчүн ыраазычылык билдирип, алынган билимди жана көндүмдөрдү Кыргызстанда практикада колдонуунун маанилүүлүгүн белгиледи.
Жолугушууда кыргыз-түрк достугу ооруканасында боорду алмаштыруу боюнча операцияларды жасоонун пландары талкууланды. Түркиядан да адистердин келиши күтүлүп жатканы айтылды.
Министр команданын даярдыгын жана керектүү техниканын абалын сурады. Жыйындын соңунда Алымкадыр Бейшеналиев боорду алмаштыруу операциясына даярдык иштерин баштоо боюнча тапшырма берди.
Биздин Телеграм каналга катталыңыз
