Транспорт жана коммуникациялар министрлиги улуттук авиация мыйзамдарын масштабдуу түрдө жаңылоону демилгеледи. Мекеме «Кыргыз Республикасынын авиациялык эрежелерин — „КРАЭ-2 Учуу эрежелерин“ бекитүү жөнүндө» буйруктун долбоорун коомдук талкууга чыгарды. Документ визуалдык учуулардын жана приборлор боюнча учуулардын жалпы эрежелеринен тартып, өзгөчө кырдаалдардагы аракеттерге, жарандык кемелерди кармоо эрежелерине жана учкучсуз аэростаттарды колдонууга чейинки кеңири чөйрөдөгү маселелерди майда-чүйдөсүнө чейин жөнгө салат.

Долбоорго ылайык, документ улуттук эрежелерди эл аралык стандарттар менен шайкеш келтирүүгө багытталган. Демилгенин максаты катары Жарандык авиациянын эл аралык уюмунун (ИКАО) ыкмаларына ылайык келтирүүнү камсыз кылуу көрсөтүлгөн. Эрежелерди мамлекеттик жана расмий тилдерде бир убакта бекитүү сунушталууда.

Бул Кыргызстандын авиациясындагы негизги мыйзам алдындагы актылардын бири — иш жүзүндө асмандагы учкучтар жана диспетчерлер үчүн «жүрүм-турум кодекси». Документ бардык нерсени: аныктамалардан тартып (эмнени турбуленттүүлүк же муз каптоо деп эсептөө керек), багытты жоготууда, учакты кармоодо же авариялык кырдаалдарда аткарыла турган так схемаларга чейинкилерди кеңири регламенттейт.

Ал бир нече ондогон бөлүмдөрдөн жана тиркемелерден турат, анда визуалдык учуулардын эрежелери, приборлор боюнча учуулар, эшелондорго бөлүү, ошондой эле өзгөчө шарттардагы учууларга жана учкучсуз аппараттарга карата талаптар жазылган. Документтин башкы максаты — авиация бирдиктүү эл аралык калыптар боюнча иштеши үчүн улуттук эрежелерди ИКАОнун катаал стандарттарына толук шайкеш келтирүү.

Коомдук талкуу 2026-жылдын 20-мартына чейин созулат. Документ кабыл алынгандан кийин жаңы эрежелердин аткарылышы Министрлер кабинетине караштуу Жарандык авиация мамлекеттик агенттигине жүктөлөт. Мекеме ошондой эле буйрукту Ченемдик укуктук актылардын мамлекеттик реестрине киргизүү үчүн Юстиция министрлигине жөнөтүүгө жана президенттин администрациясына маалымат берүүгө тийиш.

Долбоор бардык министрликтерге, мекемелерге, жарандык авиация уюмдарына жана окуу борборлоруна жаңы эрежелерди аткарууга алууну түздөн-түз тапшырат. Бул эрежелерди бекитүү менен Кыргызстан ЕБдин «кара тизмесинен» чыгууга — Евробиримдикке учууга болгон чектөөлөрдү алып салууга дагы бир кадам таштайт.