Финансы министрлиги менен Евразия реконструкциялоо жана өнүктүрүү банкы (ЕРӨБ) Кыргызстандын инфраструктурасын өнүктүрүү боюнча өз ара түшүнүшүү меморандумуна кол коюшту. Бул тууралуу Финансы министрлигинин басма сөз кызматы билдирди.

Меморандумдун алкагында жалпы суммасы 400 миллион еврону түзгөн муниципалдык инфраструктура, сугат жана транспорт тармагындагы артыкчылыктуу долбоорлорду колдоо боюнча алкактык макулдашуу даярдалат.

Бул келишим Кыргызстандын туруктуу инфраструктурасын өнүктүрүүгө жана ЕРӨБ инвестицияларын натыйжалуу пайдаланууга өбөлгө түзөт деп күтүлүүдө.

Мындан тышкары, ЕРӨБ Базар-Коргон шаарын суу менен камсыз кылуу долбоору үчүн каржылоонун экинчи траншын бөлдү — анын көлөмү 3,3 млн еврону, анын ичинде 1,6 млн евро гранттык каражатты түзөт.

Бул каражат шаардын суу менен камсыздоо системасын модернизациялоого, 60 миңден ашуун тургунду коопсуз ичүүчү сууга жана жакшыртылган санитардык шарттарга туруктуу жеткирүүгө багытталат.

Белгиленгендей, бул долбоор — 2025-жылы Кыргызстан менен ЕРӨБ кол койгон жетинчи суверендүү инфраструктуралык долбоор болуп саналат. Натыйжада, быйыл өлкөнүн инфраструктурасына банктын жалпы инвестиция көлөмү 100 млн еврого жетет.