Министрлер кабинетинин башчысы Адылбек Касымалиев Коргоо министрлигине 81 бирдик жаңы автотранспортту тапшыруу аземине катышты. Белгиленгендей, техника өздүк курамдын мобилдүүлүгүн жогорулатуу жана ыкчам жүрүүсү үчүн республикалык бюджеттин каражатынын эсебинен сатылып алынган.

Өткөрүлүп берилген партиянын курамына ата мекендик «Тулпар Моторс» заводунда чогултулган транспорт каражаттары: 36 Chevrolet Cobalt үлгүсүндөгү унаа жана 19 JAC T-6 пикабы кирди. Ошондой эле мекемеге 18 бирдик «Газель» атайын техникасы, 5 вахталык автобус жана 3 JAC Sunray кичи автобусу берилди.

Адылбек Касымалиев коргонуу жөндөмдүүлүгүн чыңдоо мамлекеттик артыкчылык бойдон кала берерин баса белгиледи. 2018–2019-жылдардан бери КР Куралдуу Күчтөрүнүн бюджети 300%дан ашыкка көбөйгөн. Бөлүнүп берилген каражаттар абадан коргонуунун заманбап системаларын, радиоэлектрондук күрөш каражаттарын сатып алууга жана аскердик инфраструктураны модернизациялоого жумшалууда.

Ведомствону санариптештирүү маселеси өзүнчө блок менен белгиленди. Учурда беш аскер комиссариатында аскердик каттоонун электрондук системасы пилоттук режимде иштеп жатат, аны үстүбүздөгү жылдын март айына чейин дагы 25 бөлүмгө киргизишет. Муну менен катар аскердик билеттерди санариптик форматка өткөрүү процесси башталды.

Кабмин башчысы ошондой эле аскер кызматчыларын социалдык жактан коргоону күчөтүү чараларын жар салды:

• турак жайды ижарага алуу үчүн суткалык компенсация Бишкекте 500 сомго чейин жана аймактарда 420 сомго чейин көбөйтүлдү;
• борбор калаада кызмат өтөгөндөр үчүн ай сайын 18 миң сом, ал эми облустарда 15 миң сом өлчөмүндө ипотекалык төлөмдөр белгиленди;
• стажы 20 жылдан ашкан аскер кызматчыларына мамлекет ипотекасы толук төлөнүп бүткөнгө чейин компенсацияны кепилдейт;
• Мамлекеттик ипотекалык компания аркылуу жакынкы арада 900дөн ашык даяр батир бөлүштүрүлөт.

Адылбек Касымалиевдин айтымында, армияны комплекстүү түрдө техника менен жабдуу жана өздүк курамдын турмуш-тиричилик шарттарын жакшыртуу мамлекеттин туруктуулугунун жана чек аралардын ишенимдүү корголушунун күрөөсү болуп саналат.