Кыргызстандын Тышкы иштер министрлиги ЖМКларда тараган КР жарандарына карата мүмкүн болуучу визалык чектөөлөрдү киргизүү тууралуу маалыматтарга байланыштуу расмий түшүндүрмө алуу үчүн АКШнын Элчилигинин консулун чакырат. Бул тууралуу мекеменин расмий билдирүүсүндө айтылат.
Буга The Washington Post басылмасындагы жарыя себеп болду. Ага ылайык, АКШ 36 өлкөнүн, анын ичинде Кыргызстандын да жарандарынын өлкөгө кирүүсүнө чектөө киргизүү мүмкүнчүлүгүн карап жатат.
КР ТИМинде учурда америкалык тараптан кандайдыр бир чектөөлөрдү киргизүү тууралуу расмий маалымат келип түшпөгөнүн баса белгилешти. Ошондой эле мекемеге мүмкүн болгон санкцияларга кабыла турган өлкөлөрдүн тизмеси кандай критерийлер менен түзүлүп жатканы түшүнүксүз бойдон калууда.
«Учурда АКШда коопсуздукту камсыздоого багытталган миграциялык мыйзамдар кайра каралып жатат», — деп белгилешти министрликтен.
АКШнын Мамлекеттик департаменти өз кезегинде ички талкууларга же басма сөздөгү билдирүүлөргө комментарий берүүдөн баш тартты.
