Бишкекте Мамлекеттик кызмат жана жергиликтүү өз алдынча башкаруу (ЖӨБ) иштери боюнча мамлекеттик агенттиктин жетекчилигинин Жапониянын Кыргызстандагы элчиси Хирано Рюити менен отчёттук жолугушуусу өттү. Сүйлөшүүлөрдүн негизги темасы — «Адам ресурстарын өнүктүрүү боюнча стипендиялык программанын» (JDS) алкагында аймактардан келген мамлекеттик кызматкерлер үчүн квоталарды көбөйтүү маселеси болду.

Мекеменин маалыматы боюнча, жолугушуу окууга талапкерлерди тандоонун аралык жыйынтыктарын чыгарууга арналды. Программага катышкан жапон университеттеринин профессорлору талапкерлердин экинчи турунун катышуучулары менен өткөрүлгөн маектешүүлөрдүн жыйынтыгы боюнча өз бааларын беришти. Мамлекеттик агенттиктин директору Элчибек Жантаев тандоо учурунда ачык-айкындуулукту жана конкурстук жол-жоболорду сактоонун зарылдыгын белгилеп, долбоор өлкө жетекчилигинин өзгөчө көзөмөлүндө экенин баса белгиледи.

«Тандоонун жогорку сапатын сактап калуу эле эмес, жер-жерлердеги кызматкерлер үчүн программанын жеткиликтүүлүгүн кеңейтүү да маанилүү. Аймактардан келген катышуучулардын санынын көбөйүшү бүткүл республика боюнча башкаруунун сапатына түздөн-түз таасирин тийгизет», — деп билдирди Элчибек Жантаев.

Элчи Хирано Рюити Кыргызстанда JDS программасын ишке ашыруунун натыйжалуулугун белгиледи. Анын айтымында, программанын көптөгөн бүтүрүүчүлөрү бүгүнкү күндө мамлекеттик аппаратта, бөлүм башчылардан тартып министрлердин орун басарларына чейинки негизги кызматтарды ээлеп келишет. Бул Жапониянын билим берүү тажрыйбасынын суроо-талапка ээ экенин тастыктайт. Дипломаттын пикиринде, долбоордун мындан аркы кеңейтилиши республиканын кадрдык потенциалын чыңдоого өбөлгө түзөт.