Мамлекеттик мүлктү башкаруу фонду май айында үч объектти аукционго коюуну пландаштырууда. Бул тууралуу фонддун төрагасы Мирлан Бакиров билдирди.

Анын айтымында, менчиктештирүү программасына кирген 20 объектинин ичинен мамлекеттик үлүшү бар төрт компанияны баалоо аяктады.

«Бул Евразия сактык банкы, «Кепилдик фонду» ААКнын 14 пайыз мамлекеттик үлүшү, «Керемет Банк» ААК жана «Кыргыз почтасы» мамлекеттик ишканасынын 0,7 пайыз акциясы. Бирок акыркы учурда баалоо процесси менчиктештирүү үчүн эмес, укуктук статусун акционердик коомго өзгөртүү боюнча жүргүзүлгөн», – дейт Мирлан Бакиров.

Мирлан Бакиров учурда мамлекеттин үлүшү менен дагы жети компанияны баалоо процесси жүрүп жатканын кошумчалады.