Жалал-Абаддын Токтогул районунда мечитте уурулук жасоого шектелип эки жаран кармалды. Бул тууралуу облустук милициядан билдиришти.
Маалым болгондой, 26-апрелде милицияга 44 жаштагы эки жаран арыз менен кайрылган. Алар билдиргендей, ошол күнү болжол менен саат 13:30да Бишкек – Ош жолунун жээгиндеги «Нур» мечитинде намаз окуп жатканда, белгисиз адамдар биринин 25 мин сомдук телефонун жана 4 миң сом акчасын жана экинчисинин 11 миң сомдук телефонун уурдап кеткен.
Аталган фактыга байланыштуу Кылмыш-жаза кодексинин 205-беренеси (уурулук) боюнча кылмыш иши козголгон.
Ыкчам-иликтөө иштеринин натыйжасында шектүү катары Бишкектин 21 жаштагы тургуну К.Т. уулу жана Чүйдүн 16 жаштагы тургуну Д.Т. кармалган.
11-майда соттун чечими менен шектүүлөр тергөө аяктаганча 2 айга камакка алынган.
Учурда кармалгандардын башка ушул сыяктуу кылмыштарга катыштыгы бар же жоктугу текшерилүүдө.
