Нарын облусунда «Нарын мото» ишканасынын мотоциклдери сатыкка чыга баштады. Бул тууралуу президенттин облустагы өкүлчүлүгүнөн билдиришти.
Аталган ишкана кытайлык инвесторлордун колдоосу менен ачылып, Ат-Башы районундагы Кара-Булак тилкесинде курулган эл аралык соода-логистикалык борбордо жайгашкан.
Ишкана кураштырган үч дөңгөлөктүү мотоциклдер 400 килограммдан 2 тоннага чейин жүк көтөрө алат. Бул унаалардын электр энергия, күйүүчү май менен жүргөн, үстү ачык жана жабык түрлөрү бар. Алардын баасы түрүнө жараша 90 миң сомдон 190 миң сомго чейин жетет.
