Кыргызстанда өлүм жазасын кайра киргизүүнү фашисттик Германиянын аракеттерине салыштырууга болот. Бул тууралуу «Мыйзам долбоорлорун талкуулоо» аттуу тегерек үстөл жыйынында укук таануучу Тахмина Ашуралиева билдирди.

«Таң калычтуу, биздин президентке кандай юристтер кеңеш берип жатышат? Бардык эрежелерге ылайык, Кыргызстан өлүм жазасын жоюу чечимин кабыл алгандан кийин аны кайра киргизе албайт. Мындай кадам 1930–1940-жылдардагы фашисттик Германиянын аракеттерине окшош болот, анда геноцид менен өлүм жазасы мыйзамдашкан. Бул дүйнөлүк деңгээлдеги трагедия болгон», — деди Ашуралиева.

Эске сала кетсек, Ысык-Көлдө 17 жаштагы кыз зордукталып, мыкаачылык менен өлтүрүлгөндөн кийин аялдарга жана балдарга карата жасалган өзгөчө оор кылмыштар үчүн өлүм жазасын киргизүүнү караган Кыргыз Республикасынын Конституциясына өзгөртүүлөрдү киргизүү боюнча мыйзам долбоору коомдук талкууга коюлган.

Кыргызстан өлүм жазасын 2007-жылы жойгон (акыркы өкүм 1998-жылы аткарылган), ал эми 2010-жылдын декабрында өлкө өлүм жазасын жоюуга багытталган Атуулдук жана саясий укуктар боюнча эл аралык пакттын Экинчи факультативдик протоколуна кошулган.