Ош шаарындагы Орозбеков көчөсүндө болгон өрт кырсыгынан каза болгон эне жана беш баланын сөөгү бүгүн жерге берилди.

Маркумдардын атасы бүгүн таң эрте Түштүк Кореядан учуп келип, жакындары менен кошо акыркы сапарга узатуу зыйнатына катышты.

Жаназа аземине Ош шаарынын мэри Жеңишбек Токторбаев, шаардык кеңештин төрагасы Болот Баетов жана жергиликтүү тургундар катышышты. Алар үй-бүлөсүн жоготкон атанын кайгысын тең бөлүшүп, сабыр жана кайрат тилешти.

Шаар бийлигинин маалыматына ылайык, маркумдардын жакындарына бардык зарыл жардамдар көрсөтүлөт.

Эскерте кетсек, аталган өрт кырсыгы Ош шаарындагы турак үйдө чыккан. Кырсыктын себептери боюнча тиешелүү кызматтар териштирүү иштерин жүргүзүп жатышат.