headhunter.kg платформасы 2026-жылдын башында кадрдык рыноктогу компаниялардын пландарын аныктоо максатында 90дон ашык жумуш берүүчүнүн арасында сурамжылоо жүргүздү. Изилдөөнүн жыйынтыгы тренддердин алмашканын көрсөтүүдө: бизнес ички оптималдашуунун пайдасына жана иштеп жаткан кызматкерлерди кармап калуу үчүн штабды агрессивдүү көбөйтүүдөн баш тартууда.

Санга караганда сапат маанилүү

HR-командалар үчүн бул жыл ишке жалдоого болгон мамилени кайра карап чыгуу менен башталды. Жаңы долбоорлор үчүн кызматкерлерди массалык түрдө топтоо экинчи планга өттү, мындай милдетти компаниялардын 13%ы гана алдына койгон.

Анын ордуна жумуш берүүчүлөр максаттуу жана сапаттуу өзгөрүүлөргө басым жасашууда. Респонденттердин 30%ы үчүн талапкерлерди тандоо сапатын жогорулатуу башкы максат болуп калды. Экинчи орунда кадрлардын агымынын ордун толтуруу (27%), үчүнчүдө бош орундарды жабуу мөөнөтүн кыскартуу (24%). Белгилей кетсек, компаниялардын 10%ы 2026-жылга ишке алуу боюнча так аныкталган тапшырмалары жок кирген.

Башкы чакырык — адаптация жана кармап калуу

HR-адистердин көңүлү тышкы рыноктон ички процесстерге бурулду. Сурамжылоого катышкан жумуш берүүчүлөрдүн дээрлик жарымы (43%) жыл башындагы иштин негизги багыты катары жаңы кызматкерлердин адаптациясын аташкан.

Маанилүүлүгү боюнча экинчи максат — негизги адистерди кармап калуу, бул тууралуу компаниялардын 37%ы билдирген. Ал эми 22%ы «Тар» жана татаал позицияларды жабууга көңүл бурууну талап кылган. Уюмдардын 8%ы гана персонал менен иштөө олуттуу өзгөртүүлөрдү талап кылбаганын кабарлашкан.

Бюджетке караганда бюрократия ишке алууну көбүрөөк кечеңдетүүдө

Изилдөө кызматкерлерди жалдоону чектеген күтүүсүз факторду аныктады. Бюджеттин тартыштыгы же рыноктогу адамдардын жетишсиздиги эмес, компаниялардын ички процесстери башкы тоскоолдук болуп калды.

• Жумуш берүүчүлөрдүн 42%ы ички макулдашууларды ишке алуу үчүн негизги тоскоолдук деп аташкан.
• 34%ы талапкерлер рыногуна байланыштуу кыйынчылыктарды белгилешкен.
• 24%ы бюджеттик чектөөлөрдү көрсөтүшкөн.
• Компаниялардын 7%ы гана жыл башында ишке алууда тоскоолдуктарга дуушар болбогонун билдиришкен.

Иш издөөчүнүн рыногу: Абайлоо жана суроо-талаптын өсүшү

Жумуш берүүчүлөр талапкерлердин 2026-жылдын башындагы жүрүм-турумун сабырдуу деп баалашууда. Респонденттердин 10%ынын пикири боюнча гана иш издөөчүлөрдүн активдүүлүгү өскөн.
Компаниялардын басымдуу бөлүгү башка тренддерди белгилөөдө:

• 27%ы талапкерлер жумуш ордун алмаштыруу маселелеринде этият болуп калганын белгилешкен.
• 24%ы айлык акы боюнча күтүүлөрдүн өскөнүн катташкан.
• 19%ы активдүүлүк былтыркы жылдын деңгээлинде калган деп эсептешет.

Жылдык стратегия

Кадрлардын агымы менен күрөшүү үчүн компаниялар каржыга гана эмес, «жумшак» инструменттерге басым жасоодо. Эң популярдуу чара катары адаптациялоо программаларын өнүктүрүү (37%) жана кызматкерлерди окутууну күчөтүү (34%) саналат.

Жумуш берүүчүлөрдүн 27%ы сый акы системасын кайра карап чыгууну кармап калуу ыкмасы катары караштырууда. Ошол эле учурда HR-брендди өнүктүрүү маселеси көпчүлүк үчүн ачык бойдон калууда: компаниялардын дээрлик жарымы (49%) жумуш берүүчүнүн имиджине инвестиция салуу максатка ылайыктуу деп чечим кабыл ала элек, 13%ы гана муну негизги артыкчылык деп атаган.