Кыргызстанга болгон мамлекеттик сапарынын алкагында Владимир Путин курамына Орусиянын вице-премьери, бир канча министрлери, президенттик администрациясынын өкүлдөрү жана ишкерлери кирген делегация менен келет. Бул тууралуу Орусия президентинин жардамчысы Юрий Ушаков билдирди.

Анын айтымында, Путин менен бирге Орусиянын вице-премьер Алексей Оверчук,
ички иштер министри Владимир Колокольцев, саламаттык сактоо министри Михаил Мурашко, транспорт министри Андрей Никитин, экономикалык өнүгүү министри Максим Решетников, илим министри Валерий Фальков, энергетика министри Сергей Цивилев жана спорт министри Михаил Дегтярев келет.

Ошондой эле делегациянын курамында президенттик администрациянын өкүлдөрү: Юрий Ушаков, Дмитрий Песков, Максим Орешкин бар.

Мындан тышкары Роспотребнадзордун жетекчиси Анна Попова, Борбордук банктын төрайымы Эльвира Набиуллина, «Росатомдун» башкы директору Алексей Лихачев, Орусиянын Аскердик-техникалык кызматташтык боюнча федералдык кызматынын жетекчисинин орун басары Михаил Бабич жана ишкерлер: Роман Абрамович, Муса Бажаев, Петр Фрадков келет.

Бүгүн, 25-ноябрда, Кыргызстандын президенти Садыр Жапаров менен Владимир Путиндин жеке жолугушуусу болот. Ал эми кеңейтилген форматтагы жолугушуу 26-ноябрда өтүп, анда тараптар соода-экономикалык жана энергетикалык кызматташтыкты, билим берүү, саламаттык сактоо жана миграция маселелерин талкуулашат.

Ал эми 27-ноябрда Бишкекте ЖККУнун Коопсуздук кеңешинин жыйыны өтөт. Ага Беларустун президенти Александр Лукашенко, Казакстандын өлкө башчысы Касым-Жомарт Токаев, Орусиянын президенти Владимир Путин жана Тажикстандын башчысы Эмомали Рахмон катышат.