Ош облусунун Өзгөн районунда окуучу мектептин 2-кабатынан секирип кеткен. Бул тууралуу облустук милициясынан билдиришти.
Маалыматка ылайык, 17-майда саат 11:40тар чамасында Өзгөн районунун Мырза-Аке айылынын 16 жаштагы тургуну денесинен жараат алып, ооруканага кайрылгандыгы жөнүндө милицияга маалымат түшкөн.
Окуя болгон жерге барган тергөө кызматы, 17-майда саат 08:00дөр чамасында Өзгөн районунун Мырза-Аке айылындагы №3 М.Нурбаев атындагы орто мектептин 2-кабатынан өспүрүм белгисиз себептерден улам секиргенин аныктаган.
Күбөлөрдүн көрсөтмөсүнө ылайык, Б.Ж. өзүнөн-өзү экинчи кабаттан секирип жибергендигин, эмне үчүн секиргендигин сураганда өзүн текшерип көрмөкчү болгонун айткан. Ошол эле учурда жабырлануучунун атасы арыз менен кайрылып, арызда баласы жөндөн-жөн терезеден секирбей турганын, мектепте ага карата терс мамиле же өзүнүн жанын кыюуга мажбур кылуучу аракеттер болушу мүмкүн деген жүйө менен кайрылган.
Аталган факты Жазык кодексинин 137-беренесинин 1-пунктунда каралган кылмыш белгилери менен катталган. Сотко чейинки өндүрүш иши башталып, тергөө иштери уланып жатканы айтылат.
