УКМК төрагасы Камчыбек Ташиев уюшкан кылмыштуу топтор жана коррупция менен күрөшүүнүн айынан ага каршы бир нече жолу кол салуу аракети болгонун билдирди.

«Бандиттердин, коррупционерлердин тууган-уруктары бар, бизди жаман көргөндөр аябай көп. Мени жок кылууга далай аракет жасалды. Президентибиздин атайын жарлыгы менен мага күзөтчүлөр берилген. Канча аракет кылышса да, биз чыдап, ишти аягына чыгарабыз», — деди ал Ноокаттагы эл менен жолугушууда.

Мындан сырткары, Ташиевдин айтымында, эки жыл мурун бир министр ага «бандиттин башчысы коркутуп жатат» деп кайрылган. Ал аткаминерди калкалап, аягында «үй-бүлөсүнө зордук көрсөтөм» деп коркуткан кылмышкер жок кылынганын билдирди.

Ошондой эле УКМК башчысы Кыргызстан бүгүнкү күндө КМШ мейкиндигиндеги уюшкан кылмыштуу топтор толук жоюлган жалгыз өлкө экенин белгиледи.