Токмок шаарында аккумулятор уурдоого шектүү катары үч жигит кармалды. Бул тууралуу Чүй облустук ички иштер башкы башкармалыгынын басма сөз кызматы билдирди.
Маалыматка ылайык, 26 жаштагы Л.Р. аттуу жергиликтүү тургун милицияга арыз менен кайрылып, 21-октябрдан 22-октябрга караган түнү үйдүн короосунан Daewoo Nexia унаасын уурдаган белгисиз адамдарга карата чара көрүүнү суранган. Бул факты боюнча кылмыш иши козголуп сотко чейинки өндүрүш иштери башталган.
Кийинчерээк унаа Токмок шаарынын кичи райондорунун биринен табылган.
Мындан тышкары бир нече жергиликтүү тургундар арыз менен кайрылышкан, алар түнкүсүн унааларынан аккумуляторлору уурдалганын билдиришкен.
Иликтөө иш-чараларынын натыйжасында 32 жаштагы И.А., 29 жаштагы Т.А., 19 жаштагы С.М. аттуу жигиттер кылмышка шектүү катары кармалышкан.
