Унаалардын терезесин карангылатууга уруксаттын бар-жоктугун Carcheck порталы аркылуу байкоого болот, ал бир жылга салык жана айыптык карызы жокторго гана берилет. Бул тууралуу Экономика жана соода министрлигинин басма сөз кызматы билдирди.
Ошондой эле министрликтин сайтында ведомстволор аралык жумушчу топ түзүлүп, кызматтын баасын жана аны көрсөтүү тартибин аныктоо боюнча талдоо жүргүзүп жатканын билдирди.
«Жүргүнчүлөрдү ташыган (такси) транспорт каражаттарынан тышкары, маркасы жана чыгарылган жылы менен чектелбестен, жүргүнчүлөрдү ташуучу унааларга гана уруксат берүү маселеси каралууда. Уруксат алгандан кийин тонировкалоо өз алдынча же техникалык тейлөө станцияларында жүргүзүлүшү мүмкүн», — деп айтылат билдирүүдө.
Уруксат кагазын бир жылдык мөөнөткө берүү сунушталууда, унаанын ээси алмашкан учурда аны кайра берүүгө жол берилет.
Carcheck электрондук кызмат көрсөтүүлөр порталы аркылуу тонировкага уруксаттын болушуна көз салуу мүмкүн болот.
«Уруксаттарды транспорт салыгын жана жол эрежесин бузгандыгы үчүн айыптарды төлөгөндөн кийин гана берүү сунушталууда. Уруксат берүү Министрлер Кабинетинин 2011-жылдын 21-февралындагы токтомунда көрсөтүлгөн алдыңкы каптал айнектерин чектелген кароону (капууну) талап кылган атайын транспорт каражаттарына жайылтылбайт», — деп айтылат Экономика жана соода министрликтин билдирүүсүндө.
Тонировкалоого уруксаттын баасы мыйзам долбоору кабыл алынгандан кийин Министрлер Кабинетинин чечими менен аныкталат.
Эске салсак, Кыргызстанда унаанын алдыңкы капталын жана алдыңкы айнектерин караңгылатууга тыюу салынган. Тыюуну бузгандар 5,5 миң сом айыпка жыгылат. Экономика жана соода министрлиги жол кыймылы боюнча айрым мыйзам актыларына өзгөртүүлөрдү киргизүү боюнча мыйзам долбоорун иштеп чыкты. Документ министрлер кабинетинин сайтында жарыяланды.
Мыйзам долбоорунда унаа ээлеринин «автотранспорттун алдыңкы эшиктеринин каптал айнектерин караңгылатуу үчүн акы төлөнүүчү уруксат алуу» укугу каралган.
Демилгечилердин айтымында, бул республикалык бюджетке салыктык эмес кирешелерди көбөйтүп, автоунаалардын айнектерин караңгылатууга мыйзамдуу түрдө уруксат алууга мүмкүндүк берет, каптал айнектери караңгылатылган унааларды башкаруудагы эреже бузуулардын санын азайтат.
