Токмок шаарындагы баасы 5 млрд 855 млн сом болгон «Темирбетон» ишканасы мамлекеттин менчигине кайтарылды. Бул тууралуу УКМКдан кабарлашты.
Атайын кызмат билдиргендей, «Темирбетон» ишканасынын 40% акциясы мамлекетке таандык болгон. Бирок алар акциялардын көпчүлүк бөлүгүнө ээ болгон В.П. аттуу жарандын тааныш-билиштерине мыйзамсыз берилип, жеке менчикке чыгарылып кеткен.
Мамлекеттик мүлк фондунун 1992-жылдагы токтому менен «Темирбетон» кооперативдик заводу акционердик коом болуп өзгөрүп, анын баасы 38 млн 264 миң рубль деп эсептелген. 1993-жылы чет элдик бир ишкана фондго кайрылып, мамлекеттин үлүшүндөгү баасы 28 млн 698 миң сом болгон 15% акциясын сатып алуу ниетин билдирген. Бирок УКМК чет элдик ишкана мамлекеттик бюджетке акча төккөнү тууралуу документти тапкан эмес.
Аны менен бирге мамлекеттин калган 25% акциясы 1992-жылдан бери Мүлк фонду тарабынан көзөмөлдөнгөн эмес, тактап айтканда мамлекетке дивиденддер түшкөн эмес.
УКМК алар аткарган иштин жыйынтыгы менен көпчулүк акциялардын ээси В.П. ишкананы мамлекетке өткөрүп бергенин билдирди.
