Президент Садыр Жапаров “Улуттук коопсуздук органдары жөнүндө” мыйзамга өзгөртүүлөрдү киргизүү тууралуу мыйзамга кол койду. Бул өзгөртүү УКМКга ДНК анализдерин жүргүзүп, жарандарга акы төлөнүүчү кызмат көрсөтүүгө укук берет. Бул тууралуу Мамлекет башчысынын маалымат саясат бөлүмү кабарлады.

Мыйзам 24-сентябрда Жогорку Кеңеш тарабынан кабыл алынган. Эми УКМК расмий түрдө соттук-эксперттик жана криминалистикалык изилдөөлөрдү, анын ичинде келишимдик негизде, мамлекеттик кызмат көрсөтүү жөнүндөгү мыйзамга ылайык акы төлөнүүчү кызматтар түрүндө жүргүзө алат.

Эске салсак, 2024-жылы УКМКнын бир бөлүмүндө Кыргызстандагы жалгыз ДНК-лаборатория иштей баштаган. Ал криминалистикалык экспертизалар үчүн — генотиптештирүү, туугандыкты аныктоо жана кылмыш болгон жерден алынган биологиялык издер боюнча инсанды аныктоо максатында колдонулуп келет.

Мурда мындай изилдөөлөрдү жүргүзүү үчүн жарандар чет өлкөлөргө кайрылууга мажбур болсо, эми УКМКнын лабораториясы бул кызматтарды өлкө ичинде көрсөтө алат. Бул генетикалык изилдөөлөрдүн жеткиликтүүлүгүн жогорулатып, жарандарга өз өлкөсүндө эле ДНК-анализ жасатууга шарт түзөт.