Бишкектин «Ак-Ордо-3» конушунда эркек киши жана анын эжеси мыкаачылык менен өлтүрүлдү. Бул тууралуу Reporter.kg’ге укук коргоо органдарындагы булак кабарлады.

Алдын ала маалыматтар боюнча, окуя 3-октябрдын кечинде болгон. Белгисиз киши үйлөрдүн бирине кирип, уктап жаткан үй ээсине бычак сайган. Анын аялы баланын ыйынан ойгонуп, кылмышкерди көргөн. Ал эми анын эжеси ызы-чуудан улам бөлмөгө чуркап киргенде, ага дагы бир нече жолу бычак сайылган. Ал эми үй ээсинин аялы үч баласы менен үйдөн качып чыгууга үлгүргөн. Эркек киши менен эжеси алган жараатынан улам каза болушкан. Кылмышкер качып кеткен.

Ички иштер министрлигинин басма сөз кызматы аталган киши өлтүрүү фактысын тастыктады. Толук маалымат кийинчерээк бериле турганы айтылды.