28 жыл мурун мыйзамсыз менчиктештирилген Бишкек шаарындагы Улуттук онкология жана гематология борборуна тиешелүү жер тилке мамлекетке кайтарылды. Бул тууралуу УКМК билдирди.
Атайын кызматтын маалыматында, аталган борбордун директорунун мурдагы орун басары К.О.И борбордун түштүк-батыш тарабында жайгашкан 46 сотых жер тилкесин менчиктеп алганы аныкталган.
1997-жылы К.О.И. өз атынан 60 унаа токтотуучу убактылуу гараж уюштуруу максатында, аталган жер тилкесин ижарага берүү боюнча Улуттук онкология жана гематология борбору менен келишим түзүү демилгесин көтөргөн.
Андан кийин ал жер тилкеге мыйзамсыз түрдө бир нече турак жайларды курган. Алардын биринде өзү 28 жылдан бери жашап келген. Жерди мыйзамсыз басып алуу фактысын жашыруу максатында кыймылсыз мүлккө кандайдыр бир каттоо документтерин алган эмес.
Текшерүүнүн жыйынтыгында аталган жер Бишкек шаарынын мэриясынын же Улуттук онкология жана гематология борборунун муниципалдык менчигинин балансында эместиги жана кадастр органдары тарабынан 28 жылдан бери бул жер участогуна идентификациялык код ыйгарылбагандыгы белгилүү болгон.
Мындан тышкары, бул жерге өзүнчө операциялык блок жана бильярд кана курулган.
Жүргүзүлгөн саралардын натыйжасында, К.О.И. менен аталган борбордун ортосунда түзүлгөн келишим жокко чыгарылып, жер тилке мамлекеттин балансына өткөрүлүп берилген.
