Бүгүн, 18-июнда Жогорку Кеңештин жыйынында үй-бүлөлүк зомбулук фактысында жазаны жана көзөмөлдү күчөтүүгө багытталган мыйзам долбоор каралып, 1-окууда жактырылды.
Бул мыйзам долбоордо үй-бүлөлүк зомбулук жасоого айыпкерлер үчүн административдик камакка алуу жоопкерчилигинин мөөнөтүн 14 күнгө чейин узартуу сунушталууда.
Ошондой эле долбоордо үй-бүлөлүк зомбулук актысын жасаган адамдардын жүрүм-турумуна электрондук байкоо жүргүзүү каралууда. Электрондук көзөмөл жүргүзүүдө билерик жана мобилдик тиркеме колдонулат.
Тактап айтканда, үй-бүлөлүк зомбулук катталган учурда алгач күч органдары тарабынан коргоо ордери берилет. Эгерде мындан кийин зомбулук токтобосо, айыпкерге электрондук билерик тагылып, анын жүрүм-туруму көзөмөлгө алынат. Көзөмөлгө алынган жаран кайрадан жабырлануучуга жакындаса, билерик аркылуу милиция кызматкерлерине билдирүү жөнөтүлөт. Алар барып, аны камашат же башка чара көрүшөт.
Мыйзам долбоорду Юстиция министрлиги сунуштап жатат.
