2026-жылдын 1-январынан тартып бийик тоолуу жана алыскы, барууга кыйын аймактарда, ошондой эле өзгөчө статусу бар чек ара конуштарында жашаган көп балалуу үй-бүлөлөргө жаңы жөлөкпул төлөнө баштайт.

Министрлер Кабинетинин маалыматына ылайык, үчүнчү жана ар бир кийинки бала төрөлгөн күндөн тартып үч жашка чыкканга чейин ай сайын 3000 сом өлчөмүндө мамлекеттик колдоо көрсөтүлөт.

Бул чечим «Мамлекеттик жөлөкпулдар жөнүндө» мыйзамды ишке ашыруу алкагында кабыл алынды.

Каржы министрлигине жөлөкпулдарды өз убагында төлөп берүү үчүн республикалык бюджеттен каражат бөлүү тапшырылды. Ал эми Эмгек, социалдык коргоо жана миграция министрлиги токтомду ишке ашыруу боюнча зарыл чараларды көрөт.