Түркиянын Улуттук коргоо министрлиги Кыргызстандын Куралдуу күчтөрүнө аскердик техникаларды, атайын техникаларды жана башка аскердик техникаларды тапшырды. Бул тууралуу Кыргызстандын Куралдуу күчтөрүнүн Башкы штабы билдирди.
Ушул жылдын 18-февралында Кыргызстандын Куралдуу Күчтөрүнүн Улуттук гвардиясынын 10126 аскер бөлүгүнүн аймагында Түркиянын аскердик-техникалык мүлктөрүн Кыргызстанга кабыл алуу жана өткөрүп берүү салтанаттуу аземи болуп өттү.
Маалым болгондой, иш-чарага Кыргызстандын Коргоо министринин биринчи орун басары, полковник Таалайбек Усубалиев, Түркиянын Атайын жана Ыйгарым укуктуу элчиси Ахмет Садык Доган мырза, Куралдуу Күчтөрдүн Улуттук гвардиясынын командачылыгы жана жеке курамы катышты.
«Салтанатта полковник Таалайбек Усубалиев Түркиянын дипломатиялык өкүлчүлүгүнүн башчысына Кыргызстандын Куралдуу күчтөрүнө көрсөткөн материалдык-техникалык жардамдары жана кыргыз аскер кызматкерлерин Түркиянын аскердик окуу жайларында окутууга көрсөткөн жардамы үчүн ыраазычылык билдирип, кыргыз тарап кызматташуунун учурдагы жана келечектүү багыттары боюнча эки тараптуу байланыштарды мындан ары да кеңейтүүгө даяр», — деп жазат Башкы штабдын басма сөз кызматы.
