Келерки жылы пенсияны 7%га көтөрүү пландалууда. Бул тууралуу Социалдык фонддун төрагасы Бактияр Алиев бүгүн, 18-ноябрда парламенттин Бюджет, экономикалык жана фискалдык саясат боюнча комитетинин жыйынында билдирди.
Отурумда депутат Айсаракан Абдибаева пенсия 7%га көбөйсө, канча сом кошуларын сурады.
Алиевдин айтымында, эгер жаран 1 миң сом пенсия алса, ага 70 сом кошулат.
«10 миң сом болсо, 700 сомго көтөрүлөт», — деди ал.
Депутат анда пенсияны кеминде 15-20%га көтөрүү керектигин белгиледи.
Бактияр Алиев 2025-жылдын үч айында жана жарым жылында түшкөн акчага карап, келерки жылы пенсия канча пайызга көтөрүлөрү так белгилүү болорун билдирди.
