Президент Садыр Жапаров “Баткен, Нарын, Ош, Талас жана Чүй облустарынын айрым айыл аймактарын жана айылдарын кайра атоо жөнүндө” мыйзамга кол койду. Бул тууралуу президенттин маалыматы кызматы билдирди.
Мыйзам 2024-жылы 5-декабрда Жогорку Кеңеш тарабынан кабыл алынган. Ага ылайык:
- Баткен районунун Говсувар айылын Орто-Боз, Лейлек районунун Чимген айылын Чымкен жана Голбо айылын Алтын-Бешик, Мадания айылын Айбике, Кыргызстандын 50 жылдыгы айылын Миң-Жыгач, Чапаев айылын Арча-Бешик;
- Нарындын Ат-Башы районунун Дыйкан айылын Чоко-Бий, Нарын районунун Жерге-Тал айыл аймагын Эсеналы Дайракунов айыл аймагы,
- Оштун Кара-Кулжа районунун Сары-Булак айыл аймагын Рыспай Абдыкадыров айыл аймагы, Өзгөн районунун Киров айылын Кенжебай,
- Таластын Айтматов районунун Куру-Маймак айылын Сатыкей, Покровка айыл аймагын Семетей айыл аймагы, Покровка айылын Семетей,
- Чүйдүн Кемин районунун Новомихайловка айылын Бообек, Сокулук районунун Военно-Антоновка айыл аймагын Кожомкул айыл аймагы, Военно-Антоновка айылын Кожомкул, Ысык-Ата районунун Горная Серафимовка айылын Кебек-Бий айылы деп кайра атоо каралган.
Маалым болгондой, бул айылдардын аттарын өзгөртүү тууралуу чечимдер жергиликтүү тургундардын жыйынында кабыл алынып, тиешелүү жол-жободон өткөн.
