Кытайлык «Хуа Руй» ишкана Чүй облусунда автоклавдык газобетон блокторун чыгаруучу завод курат. Бул тууралуу Инвестициялар боюнча улуттук агенттик билдирди.

Маалыматта айтылгандай, 4-июлда аталган кытайлык ишкана менен Кыргызстандын Министрлер кабинетинин ортосунда инвестициялык келишим түзүлгөн.

Курулуш иштери үстүбүздөгү жылдын май айында башталган жана беш жылдын ичинде бүтүрүү пландалууда.

Долбоор аймактын өндүрүштүк потенциалын өнүктүрүүгө, жумуш орундарын түзүүгө жана курулуш тармагына заманбап технологияларды киргизүүгө багытталган. Аны ишке ашыруу ички рынокту сапаттуу курулуш материалдары менен камсыздоого жана өлкөнүн экспорттук мүмкүнчүлүктөрүн кеңейтүүгө шарт түзөт.