Ысык-Көл облусунун Жети-Өгүз районундагы Кызыл-Суу айылында 18 миңге жакын тургун таза ичүүчү суу менен камсыз болду. Бул тууралуу Айыл чарба министрлиги билдирди.

Бүгүн, 24-ноябрда, «Кызыл-Суу» кичи долбоорунун ачылыш аземи болуп өттү. Ага айыл чарба министри Бакыт Төрөбаев, Дүйнөлүк банктын Кыргызстандагы кеңсесинин башчысы Хью Ридделл, долбоордун жетекчилиги жана башка бийлик өкүлдөрү катышкан.

Долбоор Дүйнөлүк банктын колдоосу менен «Климаттын өзгөрүшүнө туруктуу суу чарба кызматтарын жакшыртуу» долбоорунун алкагында ишке ашырылган.

Министрликтин айтымында, мурдагы суу менен камсыздоо системасы 1950-жылдары курулуп, тоо булактарынан самотек ыкмасы менен иштеп келген. Инфраструктуранын эскирүүсү суунун үзгүлтүксүз берилбешине жана ичүүчү суунун сапатынын начарлашына алып келген.

“Реконструкция аяктагандан кийин суу менен камсыздоо системасы бардык тургундарды 24 саат бою таза суу менен камсыздайт. Коомдук саламаттык деңгээли жогорулады, ошондой эле инфраструктуранын климаттын өзгөрүшүнө туруктуулугу артты”,- деп айтылат маалыматта.