Кыргызстандын президенттик администрациясынын маалыматтык саясат кызматынын жетекчиси Дайырбек Орунбеков Улуу Британиянын Кылмыштуулукка каршы күрөшүү улуттук агенттиги (NCA) тараткан “ири акча адалдоо тармагы эл аралык санкцияларды айланып өтүү үчүн «Керемет Банкынын» акцияларынын контролдук пакетин сатып алган” деген билдирүү боюнча комментарий берди.

Орунбековдун айтымында, Батыш өлкөлөрүнүн эки кыргызстандык банкка каршы киргизген санкциялары “Орусиянын Сбербанкына кызмат көрсөттү” деген жүйөгө негизделген. Бирок ал мындай айыптоолор экономикалык чындыкты чагылдырбай турганын жана эл аралык эсептешүүлөрдүн кадимки механизмдерин эске албай турганын белгиледи.

Ал түшүндүргөндөй, Орусияда болжол менен бир миллионго жакын кыргызстандык эмгектенет жана алар күн сайын мекенине миллиарддаган рубль которушат. Бул каражаттар Орусиядагы банктар аркылуу келип, сомго айландырылып, мигранттардын үй-бүлөлөрүнө берилет. Ал эми рублдар Кыргызстан Орусиядан импорттогон товарлар: күйүүчү май, металл, азык-түлүк, курулуш материалдары жана башка продукциялар үчүн эсептешүүдө кайра пайдаланылат.

Орунбеков мындай схема кадимки товар-акча айланышы экенин, рублдардын Орусияга кайтышы табигый процесс экенин белгиледи. Ал “акча адалдоо” деген айыптоолор негизсиз экенин айтып, Орусия банктары менен байланыштарды үзүү аракеттери кыргыз экономикасына жана мигранттардын үй-бүлөлөрүнө түздөн-түз зыян келтириши мүмкүндүгүн баса белгиледи.

Буга чейин NCA Улуу Британияда иштеген ири акча адалдоо тармагы «Керемет Банкынын» акцияларын сатып алып, санкцияларды айланып өтүүгө жана Орусиянын аскердик экономикасын колдоого көмөктөшкөн деген билдирүү тараткан.