Бүгүн, 14-апрелде, Борбордук шайлоо комиссиясы Жогорку Кеңешке №19 шайлоо округунан талапкер Улан Сариевге депутаттык мандатты тапшырды.

Комиссиянын маалыматында, жаңы депутатка белгиленген үлгүдөгү ырастама жана төш белги берилди.

Сариев Жогорку Кеңешке ушул жылдын 8-апрелинде мандатын өз каалоосу менен тапшырган Абдылдабек Эгембердиевдин бош калган ордуна келүүдө.

37 жаштагы Улан Сариев И. Раззаков атындагы Кыргыз техникалык университетин коммуникация системасынын байланыштары жана тармактары адистигин бүтүргөн.

2021–2023-жылдары “Ынтымак” партиясынан Бишкек шаардык кеңешинин депутаты болгон.