17 жаштагы Айсулуу Мукашеваны зордуктап, андан кийин мыкаачылык менен өлтүргөн деп шектелген жарандын мурда жасаган ушундай кылмышы үчүн жазасын мыйзамсыз жеңилдетишкен деп айыпталып, прокурор, жактоочу жана 3 судья кармалды. Бул тууралуу Ички иштер министрлиги билдирди.

ИИМдин маалыматында, Айсулууну өлтүрүүгө шектелип жаткан К.А. аттуу жарандын көптөгөн ушул сыяктуу кылмыштарга катыштыгы бар экендиги аныкталган. К.А. бир нече жаш кыздарды өлтүргөнүн, ал эми сөөктөрүн Бишкектин сыртындагы ээн жерлерге катып жүргөнүн мойнуна алган.

“Иликтөө учурунда кылмыштардын чынжыры 2015-жылы эле токтотулушу мүмкүн экендиги белгилүү болду. Ал жылы К.А. 21 жаштагы кызды өлтүрүүгө аракет кылганы үчүн кармалып, анын күнөөсү толугу менен далилденген. Октябрь райондук соту аны 12 жылга эркинен ажыраткан.

Бирок, 2016-жылы Бишкек шаардык сотунун судьялары: С.Б., Ж.М. жана К.А., ошондой эле прокурор Д.М. жана жактоочу С.Ж.нын ортомчулугу менен Кылмыш-жаза процессуалдык кодексинин нормаларын бузуп, жаза мөөнөтүн жеңилдетишкен. Натыйжада, кылмышкер 3 жылдан кийин боштондукка чыгып, кандуу аракетин уланткан”,- деп маалымдады ИИМ.

Ушул жылдын күз айларында К.А. жана анын жакын туугандары жасаган оор кылмышы үчүн тийиштүү жазадан кутулууга мүмкүндүк берген коррупциялык схеманын бардык жагдайларын толук ачып, кеңири маалымат беришкен.

Мунун негизинде жактоочу кармалып, камакка алынган. Ал эми Судьялар кеңеши мурда көрсөтүлгөн судьяларды кылмыш жоопкерчилигине тартууга макулдук берген.

Азыркы учурда аталган 3 судьяга Кылмыш-жаза кодексинин «Коррупция» жана «Сот адилеттигине жатпаган өкүмдү же башка соттук актыны чыгаруу» беренелери боюнча кылмыш иши козголгон. Ал эми прокурор Д.М. карата «Коррупция» беренеси боюнча кылмыштарды жасаган деп айыбы угузулган.

Бишкектин Биринчи май райондук соту айыпталуучуларды камакка алуу чечимин чыгарган. Тергөө иштери уланууда.

Ушул жылдын 29-сентябрында 17 жаштагы Айсулуу Мукашева эркек киши тарабынан зордукталып, андан соң мыкаачылык менен өлтүрүлгөн. Кылмышка шектүү катары 41 жаштагы А.А.К. кармалган.