Президент Садыр Жапаров «Кыргыз Туусу» мамлекеттик басма үйүн түзүү жөнүндө жарлыкка кол койду. Демилгенин максаты — мамлекеттик маалыматтык саясатты өркүндөтүү, полиграфиялык инфраструктураны чыңдоо, мамлекеттик ЖМКлардын туруктуу ишин камсыздоо жана бюджеттик чыгымдарды оптималдаштыруу.

Жарлыктын алкагында Министрлер кабинети бир катар мамлекеттик медиа жана басма уюмдарын бириктириши керек. Алар: «Кыргыз Туусу» жана «Слово Кыргызстана» басма үйлөрү, «Байчечекей» балдар журналы, ошондой эле «Ала-Тоо» адабий-көркөм журналы. Ошол эле учурда «Жеткинчек» гезитинин жана «Кырчын» журналынын редакциялары жоюлат. Министрлер Кабинети жаңы басма үйү жөнүндө жобону, анын штаттык ырааттамасын жана бюджетин иштеп чыгып, бекитүүгө милдеттүү.