Депутат Исманали Жороев 2026-жылдын Жогорку Кеңештин финансы, бюджет, ишкердик жана атаандаштыкты өнүктүрүү боюнча комитетинин жыйынында Улуттук статистика комитетинин кызматкерлеринин саны жана эмгек акысы тууралуу маселени көтөрдү.

Ал өлкө боюнча статистика системасында канча кызматкер иштей турганын сурады.

Улуттук статистика комитетинин төрагасынын орун басары Назира Керималиева билдиргендей, Бишкектеги райондук башкармалыктарда 70 кызматкер иштейт, Талас облусунда — 9, Нарын облусунда — 9, Ысык-Көл облусунда — 12, Баткен облусунда — 9, ал эми Кара-Сууда — 17 адам эмгектенет.

Ал ошондой эле аймактык башкармалыктардын бардык кызматкерлери стажына жараша болжол менен 26 миң сом өлчөмүндө бирдей айлык аларын маалымдады.

Депутат алардын эмгек акысын кайра карап чыгуу керектигин сунуштады. Ал белгилегендей, кызматкерлердин айлыгы узак убакыттан бери жогорулатылган эмес.