15-апрелде Стамбул шаарында Кыргыз Республикасынын Жогорку Кеңешинин төрагасы Марлен Маматалиев менен Казакстан Парламентинин Мажилисинин төрагасы Ерлан Кошановдун жолугушуусу өттү. Тараптар саясий-экономикалык жана маданий-гуманитардык байланыштарды кеңейтүү маселелери боюнча пикир алмашышты.

Маданий-гуманитардык маселелер боюнча диалогдун жүрүшүндө төрага Марлен Маматалиев олуттуу демилге менен чыкты. Ал казак тарапка көрүнүктүү кыргыз коомдук-саясий ишмери Жусуп Абдрахмановдун ысымын Казакстандын борбору Астана шаарынын борбордук көчөлөрүнүн бирине берүү мүмкүнчүлүгүн карап чыгууну сунуштады.

Марлен Маматалиев ошондой эле акыркы жылдары Кыргызстан менен Казакстандын ортосундагы кызматташтык жигердүү өнүгүп жатканын белгиледи. Ал парламенттер аралык өз ара аракеттенүү эки тараптуу мамилелерди чыңдоонун натыйжалуу механизми бойдон калууда деп баса белгиледи.

Жогорку Кеңештин спикери өткөн жылы Бишкекте Борбордук Азия өлкөлөрүнүн III Парламенттер аралык форумун жана Астанада Парламенттер аралык кеңештин III жыйынын ийгиликтүү өткөрүлгөнүн эске салды.

«Үстүбүздөгү жылы Кыргызстанда Парламенттер аралык кеңештин IV жыйынын өткөрүүнү пландап жатабыз. Бул иш-чара биздин байланыштарыбызды өнүктүрүүгө кошумча түрткү берет деп ишенем», — деп кошумчалады Марлен Маматалиев.

Мажилистин төрагасы Ерлан Кошанов Марлен Маматалиевди төрагалык кызматка шайланышы менен куттуктап, Кыргызстан менен кызматташтыкты кеңейтүү КРдин тышкы саясатынын артыкчылыктуу багыты болуп саналарын баса белгиледи.

Кошанов ошондой эле Казакстандын жаңы Конституциясын кабыл алуу боюнча жакында өткөн референдумдун жыйынтыктары тууралуу кеңири айтып берди. Анын алкагында шайлоочулардын 87%ы масштабдуу реформаларды колдошкон.

«Өзгөртүүлөрдүн алкагында бир палаталуу парламент түзүлөрү күтүлүүдө. Учурдан пайдаланып, референдумга байкоочу катары катышкан Жогорку Кеңештин депутаттарына ыраазычылык билдирем», — деп белгиледи Мажилис башчысы.