Нарын облусунун Ат-Башы районунда жол кырсыгында 2 адам каза болуп, 3 адам жабыркады. Бул тууралуу Өзгөчө кырдаалдар министрлигинин басма сөз кызматынан билдиришти.

Маалыматка ылайык, жол кырсыгы кечээ, 3-февраль күнү саат 10:30дар чамасында Ат-Башы районунун Кара-Суу айылында болгон. Анда Ауди С4 жана “Тойота Ипсум” унаалары кагышкан.  Кырсыктын кесепетинен 39 жаштагы жана 52 жаштагы адам көз жумган.

Мындан сырткары 54 жаштагы жана 30 жаштагы киши, дагы бир аял жаракат алган.

Окуя болгон жерге барган Өзгөчө кырдаалдар министрлигинин куткаруучулары каза болгон адамдарды унаадан алып чыгып, милиция кызматкерлерине өткөрүп беришип, жабыркаган адамдарды ооруканага жеткиришкен.