5-апрелде Кыргызстандын жана Тажикстандын Орусиядагы элчилери Москва шаарында жолукту. Бул тууралуу элчиликтин басма сөз кызматынан кабарлашты.
Маалыматка ылайык, Кыргызстандын Орусиядагы элчиси Гульнара-Клара Самат Тажикстандын Орусиядагы элчиси Имомуддин Сатторов менен жолугушуу өткөрдү.
Маданий-гуманитардык чөйрөдөгү биргелешкен ишмердүүлүктү өркүндөтүүгө, Оруссиядагы эки өлкөнүн диаспораларынын ортосунда байланыштарды түзүүгө жана тажрыйба алмашууга, биргелешкен маданий жана спорттук иш-чараларды уюштурууга багытталган кыргыз-тажик мамилелеринин маселелери талкууланган.
Тараптар кыргыз жана тажик элдеринин ортосундагы болгон достукту чыңдоо үчүн байланыштарды түзүүнүн маанилүүлүгү жөнүндө өз ара пикирлерин билдиришкен.
